Miyako Rice ❤ 愛生活

新濠鋒哥間季風，很久以前已經聽過佢大名，皆因佢個打邊爐實在抵食。

最近臉書美食團又連連出現呢間嘢⋯⋯終於終於無朋友的Miyako都約到老友去，呢餐飯特別鳴謝倫辣大波霸。

其實我某程度上都係「不坐窗邊位會死症候群」末期患者，望下今日個艷陽⋯⋯

嗯，我唔想十八廿二就皮膚癌英年早逝，都係坐入去算把啦。

店內空間闊落，燈光明亮，不論是三兩好友或是一大棚人都矛蚊提。

今日同老友坐卡位仔，數月不見要好好傾下八婆嘢。

蒜泥白肉卷 單點 MOP48

蒜泥白肉已貼心地幫你卷好一件件，不必再狼狽失態自己卷啦～最啱我呢啲粗粗魯魯嘅人。

而蒜蓉醬已經灑好在面頭。肉片不算特別厚，幸好肥肉比例夠，若是醬料能多些則更好。

夫妻肺片 單點 MOP48

肺片爽口，一點點辣，最鍾意佢麻勁夠！底下還有青瓜絲，好開胃！

北方水餃 單點 MOP78

十隻餃子，唔算大size，係套餐入邊個份量都幾好，大隻反而會吃唔完。

個皮做得煙煙韌韌，餡的份量還可以，但是醋和醬料不太過癮，本人偏好山西老陳醋哈哈。

水煮沸騰魚 單點 MOP118

唔夠辣！唔夠辣！唔夠辣！唔夠辣！唔夠辣！吐槽完畢，開始講正事。

魚肉幾滑，已全部去骨，肉質幾實淨。水煮魚其實從來都唔是水煮魚，而是油煮魚！

口感稍膩，辣味欠奉，吃每一片都要自行加工落辣油，一頓飯吃完辣油快要見底了。

濃湯菜苗魚腐 單點 MOP88

一枱都係heavy嘢，係我點得好hyper的時候，老友好清醒咁制止我，叫我點個清啲嘅菜，如果唔係會滯死。

事實證明，老友英明！！！！！！！！係味蕾就快失去知覺時，呢兜嘢的確係餐桌上一道清泉！

木耳爽口，菜苗好嫩，加埋枸子湯底好清好甜，重口味得多都是要抖抖的。

小雞粉條燉榛菇 單點 MOP138

呢個粉條不得了，雞仲多過粉，粉條幾彈牙亦做得入味，唔怕死咸。

有木耳同榛菇加持，口感頗有層次，可惜雞件稍鞋，但澳門無新鮮雞無辦法。

份量更係大到嚇死人，兩個人實在無力完成，感覺有小小對唔住雞媽媽十月懷胎。（好明顯高中生物已經比番曬老師）

點解呢篇食記所有標價都要寫明係「單點價」呢？之因為我地今日係食set menu嘛～

咁set menu又幾多錢啊？二人餐係MOP198+咋！！！！！！（現在酒店都良心發現嗎？）

我呢啲無底洞都飽到反肚，細食的話真係搵夠三個人先好嚟食二人餐。

講真呢，呢餐飯又唔係真係好食到上天，但真係對得住價錢啦，CP值是高的。

係出邊食個水煮魚都過百，家下一人一舊水埋單，仲想點。

店舖資料

季風 MON SOON

2886 8868

新濠鋒3樓